راح طاقم التصوير متوجه إلى مزرعة الدواجن اللي الفرخة
عايشة فيه وراح المذيع مخبط على باب العشة
تك تك تك تك
النجمة فتحت الباب و بصت فاتخضت راحت قافلة الباب بسرعة
المذيع : حضرتك متخافيش إحنا جايين لحضرتك من شركة ( فور تشيكن ).
النجمة : و الله ؟ . طب ثواني . و راحت نجمتنا فاتحة الباب و دخلت الطاقم .
النجمة : إتفضلوا إرقدو عل البيض لغاية لما أجيبلكوا حاجة تشربوها .
المذيع : لأ مفيش داعي حضرتك , إحنا جايين نعمل مع حضرتك إنترفيو
مش أكتر . النجمة : لأ اتفضلوا براحتكو . إسألوني اللي إنتو عايزينه .
المذيع : أولاً , ممكن نجمتنا تعرف نفسها للجمهور .
النجمة : **** المذيع : ممكن الإسم الثلاثي معلش ؟ .
النجمة : **** بيض الخزين مسلوق .
المذيع : و بالنسبة للمؤهل الدراسي ؟ .
النجمة : ليه الإحراج ده بقة , للأسف مفيش , بس بعرف أقرا و أنكش .
النجمة : عندي 31 شهر .
المذيع : طبعا إحنا عارفين إن كل نجم و ليه هوايات , فإيه هيّا هواياتك ؟ .
النجمة : الصراحة معنديش غير هواية واحدة و هي في نفس الوقت موهبة .
بكاكي حلو أوي .
المذيع : و يا ترى بتحبي تكاكي لمين ؟
النجمة : بحب أكاكي للفنان ( كتكوت الصغيّر )
اللي إشتهر بأغنية ( العلف العلف العلف ).
المذيع : ممكن نجمتنا تقولنا إزاي دخلت الفن من أوسع أبوابه ؟ .
النجمة : بصراحة أنا كنت مقدمة في ( فراخ أكاديمي ) في أحد الأقاليم
و كسبت بهز ريشى أولا و بالجمهور .
المذيع : و إيه تعليقك على فنانات الوقت الحالي من حيث الأداء و المظهر .
النجمة : الأداء زفت . أما بالنسبة
للمظهر فأنا بتمنى إنهم يتحشموا شوية في الريش اللي بيلبسوه .
المذيع : و بالنسبة للفنانين .
النجمة : نفس الكلام برده , بلاحظ إن كل ديك يطلع
يغني يجيب حواليه ميت فرخة مودلز بريش خليع و حركات
تخلّ بالعرف .
المذيع : في نهاية الحوار عايزين نجمتنا تقول كلمة للجمهور .....
و فجأة دخل صاحب المزرعة و ف إيده سكينة ,
راحت الفرخة بلعت ريقها
و قالت : أتمنى إن جمهوري العزيز يفتكرني بالخير , وسلام بقة عشان
رايحة أصور الكليب .
المهم بعد يوم إنتشر خبر وفاة نجمتنا على جميع القنوات اللي بتطير
والأرضية و عم الحزن على الجميع.
و عل العموم بالهنا و الشفا للي كلها
و بقوله اللي ياكل لوحده يزور
![[ كبار الشخصيات ]](https://2img.net/i/itest/ranks/stars/stars6.gif "[ كبار الشخصيات ]")
